Züle

Wos san de Züle va mundart-musik.at?

Mundoart-Musik bekaunnter mocha

Bekaunnter moch, wei:

1. De Mundoart-Musi af mundart-musik.at is oafoch guad zan hearn.
2. Da Text ist guad, kinnan si vü Leid damit identifizieren. Ned aglei, dass a Sproch g'sunga wird, de ma - hoffentli - a im Oitog redt, a de Inhoite, iwa de gsunga wird haom oft an gaonz stork regionalen Bezug.
3. Und de Musik is a hibsch genauso guad wia ba Charts-Liader, mit bessere und schwächere Künstler.

Und obwoi de Musik af dem Portal genau aso guad is, wia de in de Charts und durch den "Lokalkolorit" vielleicht sogor no interessanter is, gibt's 1 Problem:
Sie kennan earscht gaonz weng Leid.

Mundoart-Künstler höfn:

Wos mit'n 1. Punkt gaonz stoark zaom hängt: Mit dem bekaunnter mochn, wü des Portal a Mundoart-Musiker höfn.

Grod in Österreich is ois Künstler verdaummt schwar, dass ma mit seiner Musi hoiwegs a Göd mocht. Und do red i ned davo, dass ma reich wird und a ned davo, dass ma davoi hauptberuflich lebn kao, na: In Österreich is de Kunst oft ned amoi a interessante Nebenverdienst-Variantn, sondern grod aglei a Hobby.

mundart-musik.at wü Künstler gaonz konkret höfn, dass dass Leid kennan, dass mehr Konzert-Kortn und Liader verkafn, oder dass iwahaupt earscht Konzerte und Plottenverträg kriagn.
Wei nur waon ma wenigst a weng a Göd mit seiner Musi mocht, daon wird ma des a laongfristig mochn - und ned, wia's leider a grod vüle Mundoart-Künstler mochan, noch aner Zeit oafoch aufhearn.

Bewusstsein fia Mundoart schoffen, fia a richtige Mundoart:

Mundoart is fia mi unser woahre Sproch.
Leider segn des vü Leid aunderscht. Vüle föht gaonz oafoch des Bewusstsein dafia.

Vo aner broaden Öffentlichkeit weg bis eine in de Wohnzimmer va de oiwei mehr Leid güt Mundoart ois wos Negativs.

Ausserdem wissen vü Leid goar nimmer, wos eaner eigane, regionale Mundoart eigentli ist. Neben dem Z'ruckgeh va der Mundoart kao ma oiwei mehr a Verwassern va de regionalen Mundoarten segn. De "verweanern" oiwei mehr.

I wü mein Beitrog leistn, dass ma des ändern.
Mundoart soi wieder ois wos Positivs gsegn werden, ois wos Authentisches.
Mundoart - und zwoar wenigst a hoibwegs authentische, regionale Mundoart - soi wieder ois des gsegn werden, wos' is:

Ois unser woahre Sproch.

De Leid oigemein zan Nochdenga bringa:

I find', mir soitn olle oigemein mehr Nochdenga.
Iwa unser Sproch, und do gaonz bsunders iwa de Mundoart.
Iwa des Verschwinden va regionaler Kuitur und Lebensoart, za Lostn va ander oiwei gressern wodweiden Einheitskuitur.
Iwa de Zersterung va unserer Umwöd, de oiwei gresser wird.
Iwa des Ausanaondfoin va unserer Gsö'schoft af olle Ebenen.
Oigemein iwa de Ungerechtigkeit, de in dera Zeid oiwei gresser wird.

Zweitraongig iwa wos:
Mir soitn uns wieder Geaunkn iwa d'Wöd mocha und ned ois fressen, wos uns bsunders d'Massenmedien viasetzen.